يا ريته ما كان

كان يا ما كان ويا ريته ما كان

نسر جريح أسروه غربان

وبعد ما كان وكان وكان

أنكسر جناحه وقلبه أتهان

وأهو كان يا ما كان ويا ريته ما كان

ع الأرض طريح

ينادى الريح

بغضب وصريخ

" يا مين يحملنى على الأوطان "

وأهو كان يا ما كان ويا ريته ما كان

بعيد فى نسور

عايشين فى قصور

وسنين وشهور

ولا حد أفتكر النسر الغلبان

وأهو كان يا ما كان ويا ريته ما كان

فى سجنه يبكى ع الشرف

على غدر بان وانعرف

وسرب فضل الترف

ع الحق وقلد الأنسان

وأهو كان يا ما كان ويا ريته ما كان

ليله صباحه

ونَفَسه جراحه

ولآخر مرة أهو مد جناحه

وسافر على قطر النسيان

وأهو كان يا ما كان

ويا ريته ما عاش

فى دنيا الأوباش

ويا ريته .. ما كان